შიდა ქართლის სახელმწიფო რწმუნებულმა მიხეილ შაყულაშვილმა, რეგიონული განვითარებისა და ინფრასტრუქტურის მინისტრის მოადგილემ კობა გაბუნიამ და ადგილობრივი თვითმმართველობის წარმომადგენლებმა კასპსა და გორში პროგრამის ,,განახლებული რეგიონები“-ს ფარგლებში მიმდინარე და დასრულებული სამუშაოები დაათვალიერეს.

კასპში ცენტრალურ ქუჩაზე მდებარე შენობების ფასადების მოპირკეთება, სააკაძის მოედნისა და სკვერების რეაბილიტაცია უკვე დასრულდა და ამჟამად ბოლო სამუშაოები მიმდინარეობს. რაც შეეხება გორს, პროექტის I ეტაპი დასრულებულია და ამ ეტაპზე მიმდინარეობს პროგრამის II ეტაპი. პროექტის ფარგლებში სრულად განახლდა შენობების ფასადები, შეიცვალა კარ-ფანჯრები და დაირგო ნარგავები.

 

საქართველოს პრემიერ-მინისტრის მიერ ინიცირებული 4 წლიანი პროგრამა „განახლებული რეგიონები“ საქართველოს 63 მუნიციპალიტეტს მოიცავს და მისი მხოლოდ I ეტაპის საორიენტაციო ღირებულება 500 მილიონი ლარია.

 

 

პროგრამის დასრულების შემდეგ, ქვეყნის რეგიონებში განახლდება ცენტრალური ქუჩები, რეაბილიტირდება და მოეწყობა ახალი სკვერები და სხვა მუნიციპალური ინფრასტრუქტურა.