„ბავშვების ხმა მნიშვნელოვანია“ – ამ სახელწოდებით, ბავშვთა დაცვის საერთაშორისო დღესთან დაკავშირებით, გორში ღონისძიება გაიმართა, რომლის მიზანიც ბავშვთა უფლებების შესახებ ადგილობრივი არასრულწლოვნების ინფორმირება იყო.
სახალხო დამცველის აპარატის თანამშრომლებმა და მოწვეულმა ექსპერტმა ბავშვებთან ერთად ისეთ მნიშვნელოვან თემებზე იმსჯელეს, როგორიცაა აზრის გამოხატვა, თანასწორობა, ემოციური კეთილდღეობა, უსაფრთხო გარემოში ცხოვრება, სამართალდამცავ უწყებებთან ურთიერთობა და ადამიანის უფლებების შესწავლის მნიშვნელობა.
ღონისძიებას შიდა ქართლის სახელმწიფო რწმუნებული სიმონ გულედანი და გორის მუნიციპალიტეტის მერის მოვალეობის შემსრულებელი კონსტანტინე ბუზალაძე დაესწრნენ.
ღონისძიება ევროკავშირის პროექტის – „საქართველოს სახალხო დამცველის ოფისის მხარდაჭერა“ ფარგლებში, საქართველოს სახალხო დამცველის აპარატის ორგანიზებით, ასევე სახელმწიფო უწყებების, გორის მუნიციპალიტეტის მერიისა და ადგილობრივი სამოქალაქო საზოგადოების ორგანიზაციების ჩართულობით გაიმართა.