შიდა ქართლის სახელმწიფო რწმუნებული სიმონ გულედანი უფლისციხის მუზეუმ-ნაკრძალში, ადგილობრივი თვითმმართველობის წარმომადგენლებთან ერთად ტურისტული სეზონის გახსნის ღონისძიებას დაესწრო.
სტუმრებს შესაძლებლობა ჰქონდათ, გასცნობოდნენ რეგიონის ისტორიას და მონაწილეობა მიეღოთ სხვადასხვა კულტურულ აქტივობაში.
„ამ უნიკალურ სივრცეში, უფლისციხეში, ოფიციალურად ვხსნით ტურისტულ სეზონს. აქ წარმოდგენილია ჩვენი რეგიონის ოთხივე მუნიციპალიტეტი თავისი ფოლკლორით, ტრადიციებით, ხელოვნების ნიმუშებითა და ადგილობრივი მეწარმეების პროდუქციით. დამთვალიერებელს შესაძლებლობა აქვს, გაეცნოს რეგიონის ისტორიას და ჩაერთოს სხვადასხვა კულტურულ აქტივობაში. შიდა ქართლი ერთ-ერთი მიმზიდველი და მრავალფეროვანი რეგიონია ტურისტული თვალსაზრისით და მზად ვართ, ვუმასპინძლოთ როგორც უცხოელ, ისე ადგილობრივ ვიზიტორებს“, – აღნიშნა სიმონ გულედანმა.
ღონისძიებაზე შიდა ქართლის მუნიციპალიტეტებმა წარადგინეს ხელნაკეთი ნივთების გამოფენები, ადგილობრივი ნაწარმი, ტკბილეული და ადგილობრივი მარნების ღვინოები. სტუმრებს ასევე ჰქონდათ შესაძლებლობა, მონაწილეობა მიეღოთ პურისა და ნაზუქის ცხობის პროცესში.
ღონისძიების ფარგლებში, ადგილობრივი შემსრულებლების მონაწილეობით ფოლკლორული კონცერტი გაიმართა.
შიდა ქართლში ტურისტული სეზონი გაიხსნა
