,მოხარული ვარ, რომ მაქვს შესაძლებლობა დღეს ჩემი მეგობარი ხაშურელების გვერდით ვიყო და ვულოცავდე ამ შესანიშნავ დღეს“ – ასე მიმართა ლიტვის რესპუბლიკის სრულუფლებიანმა ელჩმა საქართველოში გიედრიუს პუოჯუნასმა ხაშურის ცენტრში შეკრებილ მოსახლეობას.
10 სექტემბერს ,,ხაშური – ოქროს შემოდგომა – 2016’’ აიღნიშნა. ღონისძიებას შიდა ქართლის რწმუნებულთან და ადგილობრივ თვითმართველობის წარმომადგენლებთან ერთად ხაშურის დამეგობრებული ქალაქების დეგაციები უკრაინიდან, შვედეთიდან, ლიტვიდან, ბელარუსიდან და პოლონეთიდან სტუმრობდნენ.
საზეიმო ღონისძიებები ქალაქში მთელი დღის განმავლობაში მიმდინარეობდა, მოეწყო ტურნირი ფეხბურთსა და ჭადრაკში, შეჯიბრება ქართულ ჭიდაობაში, ასევე მოეწყო ადგილობრივი მხატვრების გამოფენა, ფესტივალზე დაჯილდოვდნენ ხაშურის საპატიო მოქალაქეები. გაიხსნა რეაბილიტირებული ყაზბეგის ქუჩა, რომელიც ამიერიდან საფეხმავლო იქნება და ქალაქის ერთ–ერთ მნიშვნელოვან ცენტრად იქევა.
„დღეს გაიხსნა ქუჩა, რომელიც როგორც მოგეხსენებათ არ შეესაბამებოდა არც ერთ სტანდარტს და საგრძნობლად იყო დაზიანებული. მოპირკეთებასთან ერთად ამიერიდან საფეხმავლოც გახდა და ხაშურელელებისთვის ერთ–ერთი მნიშვნელოვანი ცენტრი იქნება, სადაც შეძლებენ დასვენებასა და განტვირთვას. ვფიქრობ, ასევე მომგებიანი პერსპექტივა უნდა იყოს კერძო სექტორისთვის. კომერციული ობიექტების განთავსების შედეგად ეს ქუჩა ხაშურს უფრო მეტად სიცოცხლისუნარიანს გახდის.“ – აღნიშნა მხარის გუბერნატორმა.
საღამო დაასრულა ფესტივალზე სპეციალურად მოწვეული პოპულარული ჯგუფის, „ეგარის“ და ადგილობრივი „Spam Jam“-ის კონცერტმა.