ზურაბ ალავიძე რეგიონებში მშენებარე ინფრასტრუქტურული პროექტების მონიტორინგს განაგრძობს, რომლის ფარგლებშიც მინისტრმა შიდა ქართლის გუბერნატორთან, კახა სამხარაძესთან და ადგილობრივი ხელისუფლების წარმომადგენლებთან ერთად ხაშურში სპორტ-კომპლექსის მშენებლობა დაათვალიერა. პროექტის ღირებულება ორ მილიონ ლარზე მეტია და სამუშაოები წლის ბოლომდე დასრულდება. კომპლექსის გახსნის შემდეგ, ადგილობრივ ახალგაზრდობას სპორტის სხვადასხვა სახეობაში ვარჯიში შეეძლება. მშენებლობაზე ამჟამად დასაქმებულია 15 ადამიანი.