გორის სპორტის სასახლეში თავისუფალ ჭიდაობაში ცოტნე ბარამიძის სახელობის რიგით მესამე მემორიალური ტურნირი ჩატარდა.
შეჯიბრებაში მონაწილეობა მიიღო 300-ზე მეტმა სპორტსმენმა (გოგონებმა და ვაჟებმა) საქართველოდან და მსოფლიოს ოთხი სხვადასხვა ქვეყნიდან. ტურნირში 2011-2013 წლებში დაბადებული მოჭიდავეები სხვადასხვა წონით კატეგორიაში დაუპირისპირდნენ ერთმანეთს.
ღონისძიების გახსნას შიდა ქართლის სახელმწიფო რწმუნებული სიმონ გულედანი, რწმუნებულის მოადგილეები, გორის მუნიციპალიტეტის მერი, ადგილობრივი თვითმმართველობის წარმომადგენლები და გულშემატკივრები დაესწრნენ.
ტურნირის დაწყებამდე საბერძნეთის, ისრაელის, სომხეთისა და ყაზახეთის გუნდებს მონაწილეობისთვის სპეციალური სიგელები გადაეცათ.
შიდა ქართლის სახელმწიფო რწმუნებულმა სიტყვით გამოსვლისას ხაზი გაუსვა ტურნირის მნიშვნელობას. მან აღნიშნა, რომ ცოტნე ბარამიძე გორისა და ქართული ჭიდაობის ერთ-ერთი გამორჩეული წარმომადგენელი იყო, რომლის ხსოვნის უკვდავსაყოფად მემორიალური ტურნირი უკვე მესამედ იმართება. მსგავსი სპორტული აქტივობები უმნიშვნელოვანესია ახალგაზრდების ფიზიკური აღზრდისა და სპორტის პოპულარიზაციისთვის.
გუნდური შედეგების მიხედვით გამარჯვება გორის გუნდმა მოიპოვა; მეორე ადგილზე ყაზახეთი, ხოლო მესამე ადგილზე სომხეთის გუნდი გავიდა.
ცოტნე ბარამიძე იყო საქართველოს ჩემპიონი თავისუფალ ჭიდაობაში, ევროპის პრიზიორი ჭაბუკებს შორის და ნუგზარ სხირელის სახელობის გორის ჭიდაობის კლუბის მწვრთნელი. ვეტერანი სპორტსმენი 2023 წლის აგვისტოში გარდაიცვალა.
ტურნირის ორგანიზატორები იყვნენ გორის მუნიციპალიტეტის მერია და სპორტის განვითარებისა და ხელშეწყობის სააგენტო, ხოლო მხარდამჭერი — საქართველოს ჭიდაობის ეროვნული ფედერაცია.