სოფელ ზეღდულეთში ახალი საჭიდაო არენა სახელოვანი გორელი მწვრთნელის გურამ პაპიტაშვილის ხსოვნისადმი მიძღვნილი მემორიალური ტურნირით გაიხსნა
სპორტულ ღონისძიებას შიდა ქართლის სახელმწიფო რწმუნებული სიმონ გულედანი, რწმუნებულის მოადგილეები მიხეილ ფავლენიშვილი და თემურ ხუბულური, გორის მუნიციპალიტეტის მერის მოვალეობის შემსრულებელი კონსტანტინე ბუზალაძე და ადგილობრივი თვითმმართველობის წარმომადგენლები დაესწრნენ.
ქართული ჭიდაობის ტურნირში სპორტსმენებმა საქართველოს სხვადასხვა მუნიციპალიტეტებიდან მიიღეს მონაწილეობა. პრიზიორები გამოვლინდნენ ხუთ წონით კატეგორიაში. საპრიზო ადგილებზე გასულ მოჭიდავეებს საჩუქრად თასები, მედლები და ფულადი ჯილდოები გადაეცათ.
გურამ პაპიტაშვილი საქართველოში ძიუდოს ერთ-ერთი ფუძემდებელია. მისი აღზრდილები არიან ოლიმპიური თამაშების, მსოფლიოსა და ევროპის ჩემპიონები.
ტურნირის ორგანიზატორები იყვნენ საქართველოს ქართული ჭიდაობის ეროვნული ფედერაცია, გორის მუნიციპალიტეტის მერია, გორის მუნიციპალიტეტის სპორტის განვითარებისა და ხელშეწყობის სააგენტო.