ქარელის მუნიციპალიტეტში თანამედროვე სპორტდარბაზისა და სასტუმროს მშენებლობა მიმდინარეობს

ქარელის მუნიციპალიტეტში თანამედროვე სპორტდარბაზისა და სასტუმროს მშენებლობა მიმდინარეობს
ქარელის მუნიციპალიტეტის სოფელ ბრეთში აქტიურ ფაზაშია თანამედროვე სპორტდარბაზის მშენებლობა. ორსართულიანი შენობა სრულად მოერგება როგორც სპორტსმენების, ასევე მაყურებლების საჭიროებებს.
პირველ სართულზე გათვალისწინებულია საჭიდაო და სატრენაჟორო დარბაზების მოწყობა, თანამედროვე სტანდარტების შესაბამისად განთავსდება გასახდელები, სველი წერტილები, საშხაპეები, ასევე სამედიცინო და ადმინისტრაციული ოთახები. მეორე სართულზე მოეწყობა ტრიბუნები და მრავალფუნქციური სივრცე სპორტული ღონისძიებების გასამართად.
პროექტის ფარგლებში იგეგმება სპორტსმენებისთვის განკუთვნილი სასტუმროს მშენებლობაც, რაც ობიექტის ფუნქციურობას მნიშვნელოვნად გააუმჯობესებს.
სამშენებლო სამუშაოების მიმდინარეობას ადგილზე გაეცნენ საქართველოს რეგიონული განვითარების მინისტრი კახაბერ გულედანი, პირველი მოადგილე ლევან ზაუტაშვილი, შიდა ქართლის სახელმწიფო რწმუნებული სიმონ გულედანი და ქარელის მუნიციპალიტეტის მერი ზაზა გულიაშვილი.
პროექტი ხორციელდება რეგიონებში განსახორციელებელი პროექტების ფონდისა და ადგილობრივი ბიუჯეტის თანადაფინანსებით. მშენებლობისთვის გამოყოფილია 5 928 361 ლარი. ობიექტის დასრულება მიმდინარე წლის სექტემბერშია დაგეგმილი.