ინფრასტრუქტურის მინისტრის მოადგილე მზია გიორგობიანი შიდა ქართლის სახელმწიფო რწმუნებულთან სიმონ გულედანთან, საფრანგეთის ელჩთან საქართველოში, ოლივიე კურტოსთან, გაერთიანებული წყალმომარაგების კომპანიის დირექტორ გიორგი შონიასთან და ადგილობრივი ხელისუფლების წარმომადგენლებთან ერთად, ხაშურის წყალმომარაგებისა და წყალარინების სისტემების მშენებლობის მიმდინარე სამუშაოებს ადგილზე გაეცნო.
მასშტაბური პროექტი რამდენიმე ლოტისგან შედგება, პირველი ლოტით გათვალისწინებულია მთელი ქალაქის წყალმომარაგების სისტემის, ხოლო ქალაქის ცენტრალურ ნაწილში – წყალარინების ქსელის მშენებლობა.
პროექტის დასრულების შემდეგ ქ. ხაშურის, სოფელ ცხრამუხის, ზემო და ქვემო ოსიაურის 44 000-მდე ბენეფიციარი 24 სთ-იანი წყალმომარაგებითა და წყალარინების გამართული ინფრასტრუქტურით ისარგებლებს
ხაშურის სასმელი წყლისა და წყალარინების ინფრასტრუქტურის მშენებლობას საფრანგეთის განვითარების სააგენტოს (AFD), ევროკავშირისა და სახელმწიფო ბიუჯეტის თანადაფინანსებით, ჯამში – 350 მილიონ ლარზე მეტი მოხმარდება