კულტურის მინისტრმა თინათინ რუხაძემ შიდა ქართლის სახელმწიფო რწმუნებულთან სიმონ გულედანთან ერთად კასპის მუნიციპალიტეტში, სოფელ ხოვლეში ივანე ჯავახიშვილის სახლ-მუზეუმის სარეაბილიტაციო სამუშაოები დაათვალიერა.
სახლ-მუზეუმის სრულ რეაბილიტაციას, კულტურის სამინისტროს მხარდაჭერით, კულტურული მემკვიდრეობის დაცვის ეროვნული სააგენტო ახორციელებს.
ამჟამად მიმდინარეობს ვიზიტორთა ცენტრის რკინაბეტონის ლენტური საძირკვლის მოწყობა და სახლ-მუზეუმის ეზოში განთავსებული ორი დამხმარე ნაგებობისთვის საძირკვლის გრუნტის მოტკეპნის, არმირების, საყალიბე სისტემების მოწყობისა და ბეტონის ჩასხმის სამუშაოები. სახლ-მუზეუმის შიდა სივრცეში იატაკიდან და კედლებიდან მოიხსნა ძველი ნალესობა და კირდუღაბის ხსნარით აღდგა ქვისა და აგურის წყობა.
XX საუკუნეში განხორციელებული არაერთი რეკონსტრუქციის მიუხედავად, სახლ-მუზეუმში ამ მასშტაბის რეაბილიტაცია აქამდე არ ჩატარებულა.
რეაბილიტაციის შედეგად:
სრულად რესტავრირდება შენობის ფასადი და შიდა სივრცე;მოეწყობა ახალი სახურავი;რეკონსტრუქცია ჩაუტარდება აღმოსავლეთის ავარიულ კედელს; აღდგება მარანი და მოეწყობა ვიზიტორთა მომსახურების ცენტრი.სახლ-მუზეუმის ტერიტორია სრულად იქნება ადაპტირებული შშმ პირთათვის.სარეაბილირაციო-სარესტავრაციო სამუშაოებს, ასევე, კასპის მუნიციპალიტეტის მერი ვახტანგ მაისურაძე, კულტურული მემკვიდრეობის დაცვის ეროვნული სააგენტოს გენერალური დირექტორი თეა ონიანი და ადგილობრივი თვითმმართველობის წარმომადგენლები გაეცვნენ.