შიდა ქართლის სახელმწიფო რწმუნებული სიმონ გულედანი კულტურული მემკვიდრეობის დაცვის ეროვნული სააგენტოს დირექტორ თეა ონიანთან ერთად, კასპის მუნიციპალიტეტის სოფელ ლამისყანაში ჯამბაკურ-ორბელიანების სახლ-მუზეუმის სარეაბილიტაციო სამუშაოებს გაეცნო.
როგორც სიმონ გულედანმა აღნიშნა, ჯამბაკურ-ორბელიანების სასახლე ერთ-ერთი მნიშვნელოვანი ისტორიული და ტურისტული ადგილია კასპის მუნიციპალიტეტში, რომელსაც არაერთი დამთვალიერებელი სტუმრობს.
მისივე თქმით, კომპლექსის რეაბილიტაციის დასრულების შემდეგ, კიდევ უფრო მეტად დაიტვირთება, რაც ხელს შეუწყობს როგორც ვიზიტორთა რაოდენობის ზრდას, ისე სახლ-მუზეუმის პოპულარიზაციას.
ამჟამად სახლ-მუზეუმის რეაბილიტაციის მეორე ეტაპი მიმდინარეობს, რაც შენობის სრულ განახლებას გულისხმობს. შეიცვლება კომუნიკაციები, გამაგრდება ნაგებობა და ისტორიული აივნები, კაპიტალური რეაბილიტაცია ჩაუტარდება შიდა ინტერიერს. სამუშაოების დასრულება 2026 წელს იგეგმება.
შენობას მინიჭებული აქვს კულტურული მემკვიდრეობის უძრავი ძეგლის სტატუსი. სამუშაოებს საქართველოს კულტურული მემკვიდრეობის დაცვის ეროვნული სააგენტო ახორციელებს.
ადგილზე ასევე იმყოფებოდნენ რწმუნებულის პირველი მოადგილე მიხეილ ფავლენიშვილი, სააგენტოს დირექტორის მოადგილე პაატა გაფრინდაშვილი, კასპის მუნიციპალიტეტის მერი ვახტანგ მაისურაძე და მუზეუმის თანამშრომლები.