სამხრეთ ოსეთის ადმინისტრაციის ინიციატივითა და ადგილობრივი მუნიციპალიტეტის მხარდაჭერით ქარელის მუნიციპალიტეტის სოფელ მოხისის დევნილთა ჩასახლებაში მოსახლეობისთვის უფასო სამედიცინო გამოკვლევები ჩატარდა. ადგილობრივებს კონსულტაციები ამბულატორიული კლინიკა ,,ნოვაციოს” სხვადასხვა პროფილის ექიმებმა გაუწიეს. ოფთალმოლოგიური კვლევის შემდეგ კი პაციენტებს, საჭიროებისამებრ, უსასყიდლოდ გადაეცათ შესაბამისი მხედველობის სათვალე.
სამედიცინო კვლევების აქციაზე იმყოფებოდნენ შიდა ქართლის სახელმწიფო რწმუნებული სიმონ გულედანი, სამხრეთ ოსეთის ადმინისტრაციის ხელმძღვანელი თამაზ ბესტაევი, რწმუნებულის პირველი მოადგილე მიხეილ ფავლენიშვილი და ქარელის მუნიციპალიტეტის მერი ზაზა გულიაშვილი.
როგორც მხარის რწმუნებულმა აღნიშნა, სხვადასხვა უწყებებთან და სამედიცინო დაწესებულებებთან თანამშრომლობის ფარგლებში მსგავსი სახის აქციები სამომავლოდაც იგეგმება, რათა მოსახლეობას ადგილზე, სოფლიდან გაუსვლელად და უფასოდ გაეწიოს მაღალი ხარისხის სამედიცინო მომსახურება.