საქართველოს რეგიონული განვითარების მინისტრმა კახაბერ გულედანმა, პირველ მოადგილესთან ლევან ზაუტაშვილთან, შიდა ქართლის სახელმწიფო რწმუნებულთან სიმონ გულედანთან, პარლამენტის წევრ ზაალ დუგლაძესთან და ხაშურის მუნიციპალიტეტის მერთად თენგიზ ჩიტიაშვილთან ერთად ქალაქ ხაშურში, “ახალი ბანას” მშენებარე მრავალფუნქციური კომპლექსი დაათვალიერა.
„ახალი ბანა“ უნიკალური კომპლექსია, რომლის ფარგლებშიც ერთ სივრცეში იგეგმება გაერთიანდეს სამონასტრო, საგანმანათლებლო, ეკონომიკური, კულტურული და საზოგადოებრივი სივრცეები. მისი მშენებლობა სრულიად საქართველოს კათოლიკოს-პატრიარქის, ილია II-ის ლოცვა-კურთხევით 2017 წელს დაიწყო. პროექტის ავტორია სურამისა და ხაშურის ეპარქიის ეპისკოპოსი მეუფე სვიმეონი.
აღსანიშნავია, რომ კომპლექსის მთავარი ტაძარი ანალოგია ტაო-კლარჯეთში, თანამედროვე თურქეთის ტერიტორიაზე მდებარე ისტორიული ბანას ტაძრისა — ერთ-ერთი გამორჩეული ძეგლის ქართული ხუროთმოძღვრების ისტორიაში.
ბანას კომპლექსის მიმდებარედ მდებარეობს ხაშურის ახლადაშენებული პროფესიული სასწავლებელი, სადაც ახალგაზრდებსა და ახალი პროფესიების დაუფლების მსურველებს შესაძლებლობა აქვთ განათლება მიიღონ თანამედროვე სტანდარტების შესაბამის გარემოში.
მეუფე სვიმეონმა ხელისუფლების წარმომადგენლებსა და სტუმრებს დეტალურად გააცნო კომპლექსის კონცეფცია, ტაძრის მშენებლობის მიმდინარეობა და მისი ისტორიულ-კულტურული მნიშვნელობა. გარდა ამისა, სტუმრებმა დაათვალიერეს პროფესიული სასწავლებლის ინფრასტრუქტურა და მოისმინეს ინფორმაცია იმ შესაძლებლობებზე, რასაც სასწავლებელი სტუდენტებს სთავაზობს.