შიდა ქართლის სახელმწიფო რწმუნებულმა სიმონ გულედანმა, მუნიციპალიტეტების მერების მოადგილეებთან და შესაბამისი უწყებების წარმომადგენლებთან, ბათუმში დაგეგმილი საერთაშორისო ტურიზმისა და სასტუმრო აღჭურვილობის გამოფენისთვის მზადების პროცესი განიხილა.
ყურადღება გამახვილდა მიმდინარე მოსამზადებელ სამუშაოებზე. აღინიშნა, რომ გორის, კასპის, ქარელისა და ხაშურის მუნიციპალიტეტებიდან წარმოდგენილი იქნებიან ადგილობრივი მეწარმეები, ღვინის მწარმოებლები, ხელოსნები და შემოქმედებითი ჯგუფები. ასევე იგეგმება მრავალფეროვანი აქტივობები, რომლებიც ვიზიტორებს მისცემს შესაძლებლობას, უკეთ გაეცნონ რეგიონის ტურისტულ, კულტურულ და ეთნოგრაფიულ თავისებურებებს.
შეხვედრაზე აღინიშნა, რომ გამოფენა წარმოადგენს მნიშვნელოვან პლატფორმას რეგიონის პოპულარიზაციისთვის, რაც ხელს შეუწყობს შიდა ქართლის ტურისტული პოტენციალის უკეთ წარმოჩენას და ეკონომიკური აქტივობის ზრდას.