საქართველოს განათლების, მეცნიერებისა და ახალგაზრდობის მინისტრმა გივი მიქანაძემ ქალაქ გორში შიდა ქართლის რეგიონის მასწავლებლებთან და სასკოლო საზოგადოების წარმომადგენლებთან შეხვედრა გამართა.
შეხვედრას შიდა ქართლის სახელმწიფო რწმუნებული სიმონ გულედანი ადგილობრივი თვითმმართველობის წარმომადგენლებთან ერთად დაესწრო.
შეხვედრის მთავარ თემას ზოგადი განათლების სისტემის რეფორმის ეროვნული კონცეფციისა და ამ მიმართულებით არსებული გამოწვევების განხილვა წარმოადგენდა.
სამუშაო შეხვედრა კითხვა-პასუხის რეჟიმში წარიმართა, სადაც პედაგოგებს საშუალება ჰქონდათ მათთვის საინტერესო საკითხებზე მიეღოთ ამომწურავი პასუხები, ასევე ახალი რეფორმის კონცეფციასთან დაკავშირებით დაეფიქსირებინათ თავიანთი მოსაზრებები.
შეხვედრას აგრეთვე საქართველოს განათლების, მეცნიერებისა და ახალგაზრდობის მინისტრის პირველი მოადგილე ლევან ღირსიაშვილი, შიდა აუდიტის დეპარტამენტის უფროსი გიორგი ურუშაძე და პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარის მოადგილე გიორგი სოსიაშვილი დაესწრნენ.