შიდა ქართლის სახელმწიფო რწმუნებულის, სიმონ გულედანის ხელმძღვანელობით, კასპში სამხარეო საკონსულტაციო საბჭოს მორიგი სხდომა გაიმართა.
სხდომაზე განიხილეს 2026 წელს რეგიონებში განსახორციელებელი პროექტების ფონდიდან დასაფინანსებელი პროექტები. საბჭოს წევრებმა ასევე მოიწონეს შიდა ქართლის 2025–2027 წლების სამოქმედო გეგმაში შესატანი ცვლილებები, მათ შორის, საქართველოს მთავრობის 2026 წლის 2 მარტის №96 დადგენილების საფუძველზე, „სტიქიის პრევენციის სახელმწიფო პროგრამის“ ფარგლებში განსახორციელებელი ახალი და ასევე, 2026 წლისთვის დაგეგმილი პროექტები.
შეხვედრის ფარგლებში იმსჯელეს „მაღალმთიანი დასახლებების განვითარების ფონდის“, „სტიქიის შედეგების სალიკვიდაციო ღონისძიებების“, „გამყოფი ხაზის მიმდებარე დასახლებებში ინფრასტრუქტურის განვითარების“, „სოფლის მხარდაჭერის პროგრამისა“ და „მოქალაქეთა ჩართულობის განვითარების ხელშეწყობის“ პროგრამების ფარგლებში განსახორციელებელ პროექტებზე.
დღის წესრიგის ერთ-ერთ საკითხს წარმოადგენდა საჯარო სკოლების გამართული ფუნქციონირების უზრუნველსაყოფად დაგეგმილი ღონისძიებები.
საკონსულტაციო საბჭოს სხდომას სახელმწიფო რწმუნებულის პირველი მოადგილე მიხეილ ფავლენიშვილი, მუნიციპალიტეტების მერები, საკრებულოების თავმჯდომარეები და მათი მოადგილეები, ასევე სახელმწიფო რწმუნებულის ადმინისტრაციის წარმომადგენლები ესწრებოდნენ.
შიდა ქართლში სახელმწიფო რწმუნებულთან არსებული სამხარეო საკონსულტაციო საბჭო კვარტალში ერთხელ, ყოველ სამ თვეში იკრიბება და რეგიონის განვითარებისათვის მნიშვნელოვან საკითხებს განიხილავს.