კასპის მუნიციპალიტეტის სოფელ ჩანგილარში ახალი საბავშვო ბაღი აშენდა. პროექტი მუნიციპალური განვითარების ფონდის დაფინანსებით განხორციელდა. საბავშო ბაღის შენობა ორ სოფელში – ფერმასა და ჩანგილარში მცხოვრებ პატარებს მოემსახურება. აღშანიშნავია, რომ დღემდე საბავშვო ბაღს დამოუკიდებელი შენობა არ ჰქონდა და ნაქირავებ სახლში ფუნქციონირებდა.
50 ბავშვზე გათვლილი ახალი ბაღი სრულად შეესაბამება თანამედროვე სტანდარტებს და ადაპტირებულია სპეციალური საჭიროების მქონე პირებისთვის. გარდა ამისა, მოეწყო ეზო და სათამაშო მოედანი.
საბავშვო ბაღის გახსნის ღონისძიებას შიდა ქართლის სახელმწიფო რწმუნებული ლევან ხარაბაძე, კასპის მუნიციპალიტეტის მერი ვახტანგ მაისურაძე და ადგილობრივი თვითმმართელობის წარმომადგენლები დაესწრნენ. რწმუნებულის თქმით, ფერმა და ჩანგილარი ეთნიკური უმცირესობებით დასახლებული სოფლებია და მნიშვნელოვანია, რომ ადგილობრივ მოსახლეობას ხელმსაწვდომობა ჰქონდეთ საგანმანათლებლო ინფრასტრუქტურაზე. ,,ვულოცავ პედაგოგოებსა და ადგილობრივ პატარებს, ასევე მათ მშობლებს ახალი საბავშვო ბაღის გახსნას, წარმატებებს და ნაყოფიერ სასწავლო წელს ვსურვებ. აქვე აღვნიშნავ, რომ მალე დასრულდება სოფელ ფერმაში საჯარო სკოლის მშენებლობაც. ჩვენთვის მნიშვნელოვანია, ადგილობრივ ბავშვებსა და მოსწავლეებს განათლების მიღება კომფორტულ და შესაბამის გარემოში ჰქონდეთ.“ – აღნიშნა ლევან ხარაბაძემ.