სახელმწიფო პროგრამის „ჩემი პირველი ნერგის“ ფარგლებში, შიდა ქართლის რეგიონის საჯარო სკოლების პირველკლასელებმა მწვანე ნარგავები სკოლების, საბავშვო ბაღების ეზოებსა და სკვერებში დარგეს.
გამწვანების აქციას შიდა ქართლის სახელმწიფო რწმუნებული სიმონ გულედანი დაესწრო, რომელიც კასპის N3 საჯარო სკოლას ეწვია და პატარებთან ერთად აქციაში მონაწილეობა მიიღო.
საქართველოს მთავრობის ინიციატივით, ქვეყნის მასშტაბით 41 000-ზე მეტი პირველკლასელი გამწვანების მასშტაბურ ღონისძიებაში ჩაერთობა და საკუთარ პირველ ნერგს დარგავს.
პროგრამა „ჩემი პირველი ნერგი“ საქართველოს პრემიერ-მინისტრის, ირაკლი კობახიძის მიერ ხელმოწერილი განკარგულების საფუძველზე ხორციელდება. მის განხორციელებაში ჩართულნი არიან: საქართველოს გარემოს დაცვისა და სოფლის მეურნეობის სამინისტრო (სსიპ გარემოსდაცვითი ინფორმაციისა და განათლების ცენტრი), საქართველოს განათლების, მეცნიერებისა და ახალგაზრდობის სამინისტრო, თბილისის მერია, სახელმწიფო რწმუნებულების ადმინისტრაციები და მუნიციპალიტეტები.
პროგრამის ფარგლებში, ნერგების დარგვა 22 ოქტომბერს დაიწყო და 9 ნვემბრის ჩათვლით გაგრძელდება. სულ 12 სახეობის ნერგი დაირგვება, რომლებიც რეგიონების ბუნებრივი და კლიმატური პირობების გათვალისწინებით შეირჩა. ასევე, პროგრამისთვის სპეციალურად შეიქმნა ვებპლატფორმა https://cheminergi.eiec.gov.