კასპის მუნიციპალიტეტის სოფელ მეტეხში ქართულ ჭიდაობაში რესპუბლიკური ტურნირი გაიმართა, რომელიც საქართველოს დამსახურებული მწვრთნელისა და მეტეხელი ვეტერანი მოჭიდავის, ნუგზარ მამულაშვილის 70 წლის იუბილეს მიეძღვნა.
ნუგზარ მამულაშვილს ქართულ ჭიდაობაში განსაკუთრებული წვლილი მიუძღვის. მისი აღზრდილები არაერთგზის გამხდარან მსოფლიო, ევროპის და საქართველოს ჩემპიონები. იგი დღესაც აქტიურად აგრძელებს სამწვრთნელო საქმიანობას და საკუთარ გამოცდილებას ახალგაზრდა სპორტსმენებს უზიარებს.
საიუბილეო სპორტულ ღონისძიებას საქართველოს სპორტის მინისტრი შალვა გოგოლაძე, შიდა ქართლის სახელმწიფო რწმუნებული სიმონ გულედანი, კასპის მუნიციპალიტეტის მერი ვახტანგ მაისურაძე, საკრებულოს თავმჯდომარე შოთა ბეგლარაშვილი, მოწვეული სტუმრები და სპორტის გულშემატკივრები დაესწრნენ.
ღონისძიების ფარგლებში, სტუმრებმა ტურნირში გამარჯვებული სპორტსმენები დააჯილდოვეს — მათ მედლები, დიპლომები, თასი და ფულადი პრიზები გადაეცათ.
საქართველოს სპორტის მინისტრმა შალვა გოგოლაძემ ნუგზარ მამულაშვილი სპორტის რაინდის საპატიო წოდებაზე წარადგინა, რომელიც მას უახლოეს პერიოდში მიენიჭება.