შიდა ქართლის სახელმწიფო რწმუნებული სიმონ გულედანი, ხაშურის მუნიციპალიტეტის მერ პაატა ჩადუნელთან და ადგილობრივი თვითმმართველობის წარმომადგენლებთან ერთად, ქალაქში მიმდინარე საგზაო-სარეაბილიტაციო სამუშაოებს გაეცნო.
რწმუნებული ასევე შეხვდა კონტრაქტორი კომპანიების წარმომადგენლებს, სადაც მხარეებმა მიმდინარე პროექტები და შესრულების ვადები განიხილეს. შეხვედრის შემდეგ სიმონ გულედანმა სარეაბილიტაციო ობიექტები დაათვალიერა.
ხაშურში ამჟამად რამდენიმე მსხვილი ინფრასტრუქტურული პროექტი მიმდინარეობს. კერძოდ, ტაბიძის ქუჩის რეაბილიტაციისთვის 4 160 000 ლარია გათვალისწინებული და სამუშაოები გზის საფარის განახლებასთან ერთად, ტროტუარების მოწყობას, გარე განათების სისტემის განახლებასა და სანიაღვრე ინფრასტრუქტურის მოწესრიგებას ითვალისწინებს. პარალელურად, კოსტავას ქუჩის რეაბილიტაციისთვის 1 751 945 ლარი დაიხარჯება.
პროექტის ფარგლებში ეწყობა ქვაფენილი, წესრიგდება სანიაღვრე არხები და ტროტუარები, ასევე მონტაჟდება თანამედროვე გარე განათების სისტემა. გარდა ამისა, აქტიურად მიმდინარეობს ქალაქის ცენტრალური მოედნის რეაბილიტაციაც, რომლის ღირებულება 1 777 000 ლარს შეადგენს. აღნიშნული პროექტი ითვალისწინებს მოედნის ტექნიკური პარამეტრების გაუმჯობესებას, გზის საფარის განახლებას, სატრანსპორტო მოძრაობის უსაფრთხოების თანამედროვე ელემენტებით აღჭურვასა და გარე განათების ახალი სისტემის მოწყობას.
ტაბიძისა და კოსტავას ქუჩები ქალაქის ცენტრალურ ნაწილში მდებარეობს და მათ არა მხოლოდ ადგილობრივი მოსახლეობა, არამედ მუნიციპალიტეტის სხვადასხვა ადმინისტრაციული ერთეულიდან ჩამოსული მოქალაქეებიც აქტიურად იყენებენ. ქუჩების მასშტაბური რეაბილიტაცია მნიშვნელოვნად გააუმჯობესებს როგორც სატრანსპორტო მოძრაობას, ისე მოსახლეობის უსაფრთხო და კომფორტულ გადაადგილებას.