სოფელ ძლევიჯვარში ქართული ჭიდაობის გუნდური ღია პირველობა გაიმართა. შეჯიბრება შიდა ქართლის სახელმწიფო რწმუნებულის ადმინისტრაციისა და საქართველოს ეროვნული ოლიმპიური კომიტეტის რეგიონული ორგანიზაციის ინიციატივით, ქართული ჭიდაობის ეროვნული ფედერაციის ორგანიზებითა და ქარელის მუნიციპალიტეტის მერიის მხარდაჭერით ჩატარდა.
შეჯიბრებაში რეგიონის ოთხივე მუნიციპალიტეტიდან 7 გუნდი მონაწილეობდა.
პირველი ადგილი გორის გუნდმა დაიკავა, მეორე ადგილზე ქარელის მუნიციპალიტეტის გუნდი „ხაბარელი I“, ხოლო მესამე ადგილზე — „ხაბარელი II“ გავიდა. საპრიზო ადგილზე გასულ გუნდებს მედლები და ფულადი ჯილდოები გადაეცათ.
შეჯიბრებას შიდა ქართლის სახელმწიფო რწმუნებული სიმონ გულედანი, რწმუნებულის მოადგილე თემურ ხუბულური და ქარელის მუნიციპალიტეტის მერი ზაზა გულიაშვილი დაესწრნენ.
ღონისძიების ფარგლებში, საქართველოს ეროვნული ოლიმპიური კომიტეტის შიდა ქართლის რეგიონალურმა ორგანიზაციამ ქარელის მუნიციპალიტეტის მერს, ზაზა გულიაშვილს, შიდა ქართლის სპორტული თამაშების მხარდაჭერისა და ჩართულობისთვის მადლობის სიგელი გადასცა.
„შიდა ქართლის სპორტული თამაშები“ 2022 წლიდან ყოველწლიურად იმართება და მისი მიზანი რეგიონში სპორტის სხვადასხვა სახეობის პოპულარიზაცია და მუნიციპალიტეტებს შორის სპორტული თანამშრომლობის გაძლიერებაა.
2026 წლის თამაშები 16-24 სექტემბერს ოთხ სპორტის სახეობაში — ქართულ ჭიდაობაში, 3×3 კალათბურთში, მძლეოსნურ გარბენსა და ფეხბურთში — ჩატარდება. შეჯიბრებებში რეგიონის ოთხივე მუნიციპალიტეტის გუნდები მიიღებენ მონაწილეობას.
თამაშების ფარგლებში დაგეგმილი შეჯიბრებები:
16 სექტემბერი — ქართული ჭიდაობა, სოფელ ძლევიჯვარის ღია საჭიდაო არენა; 18 სექტემბერი — 3×3 კალათბურთი, კასპის სპორტული დარბაზი; 20 სექტემბერი — მძლეოსნური გარბენი, გორი; 22-24 სექტემბერი — ფეხბურთი, ნახევარფინალები კასპისა და ხაშურის სტადიონებზე, ფინალი და მესამე ადგილისთვის მატჩი — ხაშურის სტადიონზე.„შიდა ქართლის სპორტული თამაშების“ ინიციატორები და ორგანიზატორები არიან შიდა ქართლის სახელმწიფო რწმუნებულის ადმინისტრაცია და საქართველოს ეროვნული ოლიმპიური კომიტეტის შიდა ქართლის რეგიონალური ორგანიზაცია.