შიდა ქართლში სახელმწიფო რწმუნებული სიმონ გულედანი „ლომჭაბუკის“ სკვერში გამართულ ღონისძიებას – „გმირის დღე“ დაესწრო. პროექტი საქართველოს პარლამენტის ქალთა და ბავშვთა საკითხებზე მომუშავე დროებითი კომისიის თავმჯდომარის, მარიამ ლაშხის ინიციატივითა და ადგილობრივი საბჭოს ორგანიზებით გორის საჯარო სკოლების უფროსკლასელებისთვის ჩატარდა.
ღონისძიების ფარგლებში ისტორიკოსმა და პარლამენტის წევრმა გიორგი სოსიაშვილმა მოსწავლეებს ლექცია თემაზე – „დავით აღმაშენებლის ცხოვრების ნაკლებად ცნობილი ეპიზოდები“ წაუკითხა, რომელიც ინტერაქციული დისკუსიით გაგრძელდა.
შეხვედრას ასევე ესწრებოდნენ მუნიციპალიტეტის მერიის, საკრებულოს, გორის სახელმწიფო უნივერსიტეტისა და საგანმანათლებლო რესურსცენტრის წარმომადგენლები.